SMZ yafikiria kuvifufua viwanda vidogo vidogo

Serikali ya Mapinduzi ya Zanzibar inaangalia mazingira ya  kuimarisha pamoja na kuvifufua Viwanda Vidogo vidogo ili kuongeza soko la ajira sambamba na kupata mbinu za usindikaji wa mazao mbali mbali yanayozalishwa hapa Nchini.

Makamu wa Pili wa Rais wa Zanzibar Balozi Seif Ali Iddi alieleza hayo wakati akizungumza na Balozi Mpya wa India Nchini Tanzania Bwana Debnath Shaw aliyefika Ofisini kwake Vuga Mjini Zanzibar kujitambulisha rasmi.

Balozi Seif alisema Zanzibar imekuwa na historia kubwa ya masuala ya Viwanda vidogo vidogo hasa katika miaka ya thamanini jambo ambalo lilileta faraja kwa bidhaa za Zanzibar katika Soko la Mataifa ya Mwambao wa Afrika Mashariki.

Makamu wa Pili wa Rais wa Zanzibar alimuomba Balozi huyo wa India Nchini Tanzania kuyashawishi Makampuni ya Nchi yake kuitumia fursa hiyo ya uwekezaji katika sekta ya Viwanda kwa lengo la kusaidia Uchumi wa Zanzibar sambamba na kuongeza mapato ya Makampuni hayo.

Balozi Seif aliipongeza na kuishukuru Serikali ya India kwa hatua yake inayochukuwa ya kuunga mkono harakati za Maendeleo za Zanzibar hasa katika masuala ya Uhandisi, Afya na Elimu.

Alisema idadi ya Wanafunzi wa Zanzibar wanaopatiwa mafunzo mafupi na marefu Nchini India imeongezeka zaidi na kuleta ufanisi katika Taasisi za Serikali.

“ Ongezeko la idadi ya Wanafunzi wa Zanzibar wanaopata Taaluma India imesaidia kuimarisha uhusiano zaidi  wa Kiuchumi na Ustawi wa Jamii kati yetu na Nchi hiyo”. Alifafanua Balozi Seif.

Alimuhakikisha Balozi huyo mpya wa India Nchini Nchini Tanzania kwamba Uhusiano huo wa muda mrefu kati ya pande hizo mbili utazidi kudumishwa kwa faida ya jamii ya Wananchi wa Nchi hizo.

Mapema Balozi Mpya wa India Nchini Tanzania Bwana  Debnath Shaw alisema katika kuunga mkono Mataifa ya Bara la Afrika Nchi yake yake tayari imeshaandaa Mpango wa kuongeza  ushirikiano wake na Mataifa hayo ndani ya kipindi cha Miaka mitano iliyopita.

Balozi Debnath alisema mpango huo umelenga zaidi kuyaongezea nguvu za kiuchumi Mataifa hayo katika masuala ya Taaluma na uwekezaji kwenye Sekta ya Afya.

Wakati huo huo Makamu wa Pili wa Rais wa Zanzibar Balozi Seif Ali Iddi alikutana na Mkurugenzi wa Idara ya Mambo ya Nchi za Nje na Ushirikiano wa Kimataifa Zanzibar Balozi Silima K. Haji aliyefika kujitambulisha baada ya kuteuliwa kushika wadhifa huo hivi karibuni.

Katika mazungumzo yao yaliyofanyika Ofisini kwake Vuga Mjini Zanzibar Balozi Seif alisema Idara hiyo ni muhimu kwa vile imeundwa  maalum kwa ajili ya itifaki ya Zanzibar.

Makamu wa Pili wa Rais wa Zanzibar alimueleza Balozi Khamis kwamba Zanzibar hivi sasa iko katika  muelekeo mpya wa uendeshaji wa Serikali katika mfumo wa Umoja wa Kitaifa.

Hivyo aliiomba Taasisi hiyo muhimu kutumia nguvu zake katika kuhakikisha  inaitangaza Zanzibar  kimataifa ili ieleweke kutokana na mfumo huo mpya.

Alisema yapo matumaini makubwa ya Serikali ya Mapinduzi ya Zanzibar kuendelea kuwa imara kutokana na uwakilishi wa Viongozi wa pande zote mbili ambazo zilikaribiana katika matokeo ya kura katika uchaguzi Mkuu uliopita.

 Othman Khamis Ame

Ofisi ya Makamu wa Pili wa Rais wa Zanzibar