Waziri Mkuu wa Jamhuri ya Muungano wa Tanzania, Mizengo
Kayanza Peter Pinda amewataka wamiliki wa MwanaHalisi waende mahakamani wakiona
kuwa kulifungia gazeti lao kwa muda usiojulikana hawakutendewa haki.
Waziri Mkuu alikuwa anajibu swali lililoulizwa la papo kwa
papo Bungeni Dodoma lililoulizwa na Mbunge wa Jimbo la Hai ambaye ni Mwenyekiti
wa Chama cha Demokrasia na Maendeleo (CHADEMA) ambaye pia ni Kiongozi wa Kambi
ya Upinzani Bungeni, Freeman Mbowe aliyetaka kujua ni lini gazeti la
kiuchunguzi litafunguliwa maana hakuna ukomo wa kufunguliwa kwake.
Waziri Mkuu amesema kuwa sio gazeti tu litakalofungiwa kama
likikiuka sheria zilizopo bali chama, taasisi au shirika na mtu binafsi
atachukuliwa hatua kali za kisheria iwapo atakiuka taratibu na sheria
zilizowekwa.
Mbowe alienda mbali zaidi kwa kuhoji kuwa Sheria ya Magazeti
iliyotumiwa kulifungia imepitwa na wakati kwa kuwa ni kandamizi na kwamba hata
Jaji Francis Nyalali alipendekeza kufutwa. Waziri Mkuu amesema kuwa hiyo ni
sheria halali iliyotungwa na Bunge na haijafutwa kutoka kwenye vitabu vya
sheria na kwamba hadi hapo itakafutwa na bunge itakoma kutumika kwake.
Wakati huo huo, Mbunge wa Tabora Mjini Ismael Aden Rage
amemuuliza Waziri Mkuu kuwa kwanini serikali haiwachukulii hatua kali
wanaotumia nyaraka za siri za serikali na kuzipitisha kwenye vyombo vya habari.
Waziri Mkuu kama kawaida yake akasema serikali iko makini katika hilo ila
inalegeza kidogo lakini itakapoanza kuzitumia sheria hizo wale wote wanaohusika
watachukiwa kama ndege tai.
Katika maendeleo mengine kuhusu suala hilo la MwanaHalisi,
kufuatia kikao kilichoitishwa na MISA Tan kujadili suala la kutafuta haraka
njia za kuitaka serikali ilifungulie gazeti hilo na kupendekeza njia za
kuchukua za haraka, kamati iliyoundwa ili kupanga mikakati inakutana katika
kikao chao cha kwanza leo.
Kikao cha pili cha kamati hiyo maalum kitafanyika siku ya
Jumamosi ambapo siku ya Jumatano (22/08/2012) kitafanyika kikao kikubwa
kitakachohusisha wanaharakati, watetezi wa haki za binadamu, waanahabari pamoja
jukwaa la wahariri ili kuanza utekelezaji wa haraka wa njia za kuibana serikali
kuifungulia MwanaHalisi.
Baadhi ya njia zilizopendekezwa ni kuiomba Jumuia ya
Kimataifa na tasisi za Umoja wa Mataifa kuifungia Tanzania misaada, kuwafutia
vibali vya kusafiri nje viongozi wa serikali katika nchi zao pamoja na kupanga
mikakati mingine ya kususia kuishirikisha au kushiriki katika masuala yote ya
serikali kwa viongozi waliohusika katika kulifungia gazeti hilo (black out).
0 comments:
Post a Comment