Wananchi wameombwa kutoa Ushirikiano kwa Makarani wa
Sensa kwa kutoa taarifa sahihi za kaya zao ili kupata takwimu sahihi kwa ajili
ya Mipango ya Manedleo Nchini.
Ombi hilo limetolewa na
Makamu wa Pili wa Rais wa Zanzibar Balozi Seif
Al Iddi wakati akifunguwa Mafunzo ya siku 12 kwa Wakufunzi wa Sensa ya Watu na
Makazi ya Mwaka 2012 ngazi ya Mkoa yanayoendelea huko chuo Kikuu cha Zanzibar Tunguu.
Balozi Seif ambaye pia ni Mwenyekiti Mwenza wa Kamati
ya Taifa ya Sensa Tanzania
alisema ni vyema Wananchi wakatunza kumbu kumbu za Taarifa za maswali
yatakayoulizwa kwa Watu wote watakaolala katika kaya zao usiku wa kuamkia siku
ya Sensa.
Alisema kumbu kumbu hizo ndizo zitakazotumiwa kujibu
maswali watakayoulizwa na Makarani wa Sensa siku watakayofika katika kaya zao
katika kipindi cha kuhesabu Watu.
Hata hivyo Balozi Seif alisisitiza kwamba kazi ya
kuhesabu kamwe haitasimamisha shughuli za Kiuchumi au Kijamii kwa vile Makarani
wa Sensa watapita katika kaya zao.
Makamu wa Pili wa Rais wa Zanzibar alikumbusha kwamba
kila Mtu atakayelala Nchini Usiku wa kuamkia siku ya Sensa ikimaanisha tarehe
25 kuamkia tarehe 26 Agosti Mwaka 2012 lazima ahesabiwen na hesabu hiyo ni mara
moja tu.
Aliwataka Wakufuzi hao kuwa makini katika utekelezaji
wa Majukumu yao hasa watakaporudi kutoa mafunzo
Wilayani kwa lengo la kujenga mazingira bora ya kufanikisha zoezi hilo muhimu.
“ Tunahitaji Wakufunzi kuwa makini. Mkiburunga hapa
maana yake mtakwenda kuburunga huko muendako kutoa Taaluma”. Alitahadharisha
Balozi Seif.
Alipendekeza ile sifa ya Tanzania ya kufanya vyema katika
Sensa ya Mwaka 2001 na kupata Heshima kubwa katika nyanja ya Kimataifa inapaswa
kulinda na kuenziwa.
Alisema mbali ya mafanikio hayo kuwa darasa kwa Mataifa
Kadhaa Barani Afrika lakini pia Tanzania
ilichaguliwa kuwa Mjumbe wa Kamisheni ya Takwimu ya Umoja wa Mataifa kwa kipindi cha miaka mine kuanzia mwaka 2012.
Balozi Seif alielezea matumaini yake kwamba uzoefu,
Taaluma na umakini walionao Wakufunzi hao watazingatia mafunzo yao ili kuhakikisha kwamba
wanaifanya kwa weledi na ufanisi mkubwa zaidi kuliko ule wa mwaka 2001.
Akizungumza na Vyombo mbali mbali vya Habari mara
baada ya hotuba yake kuhusiana na Ushiriki wa Waislamu katika suala la Sensa
Makamu wa Pili wa Rais wa Zanzibar Balozi Seif alisema Serikali itajitahidi
kuzungumza na Viongozi wa Taasisi za Kidini ili kuondoa ushawishi unaoweza
kuvuruga zoezi hilo.
Balozi Seif aliongeza kusema kwamba kutokana na
umuhimu wa Takwimu za Sensa kwa ustawi wa Jamii ni vyema Taasisi za Kidini
zikashirikiana na Serikali katika ufanisi wa suala hili muhimu kwa Umma
linafanikiwa vyema.
Mapema Kaimu Waziri wa Nchi Ofisi ya Makamu wa Pili wa
Rais wa Zanzibar
Mh. Ali Juma Shamhuna alisema Takwimu za Sensa kwa kiasi kikubwa zitaliwezesha Taifa kupanga Mipango sahihi ya Maendeleo.
Waziri Shamuhuna alisema Serikali imejiandaa kufanya
Sensa ya Watu tarehe 26 Agosti ili kujua Rasilmali Watu Nchini kwa kupitia
utaratibu huu wa Sensa.
Alisema mbali ya mambo hayo lakini pia Takwimu hizi
kwa mwaka huu zitaweza kusaidia kutathmini Mpango wa Taifa wa kupunguza
Umaskini Zanzibar { Mkuza } na ule wa Bara Mkukuta sambamba na dira 2020 kwa Zanzibar na 2025 kwa Tanzania Bara.
Mafunzo hayo ya Wakufunzi wa Sensa ya Watu na Makazi
ya mwaka 2012 ngazi ya Mkoa yataendelea hadi Tarehe 27 Mwezi huu wa Julai Mwaka
2012.
Othman Kahmis Ame
Ofisi ya Makamu wa Pili wa Rais wa Zanzibar
0 comments:
Post a Comment