Wizara ya mambo ya Nje ihakikishe sara ya kuimarisha uchumi wa Tanzania

Kazi kubwa inayoikabili Wizara ya Mambo ya Nchi za Nje na Ushirikiano wa Kimataifa Tanzania ni kuhakikisha ile sera ya Mambo ya nje ya kuelekea kwenye uchumi inaimarishwa zaidi na kutekelezwa ipasavyo.

Makamu wa Pili wa Rais wa Zanzibar Balozi Seif Ali Iddi ameeleza hayo katika Kipindi Maalum cha Mahojiano wakati akizungumza na Afisa wa Habari wa Wizara ya Mambo ya Nchi za nje na Ushirikiano wa Kimataifa Nd. Mindi Kasiga hapo Ofisini kwake Vuga Mjini Zanzibar.

Balozi Seif alisema utekelezaji wa sera za Diplomasia ya uchumi hivi sasa umekuja kufuatia kumalizika kwa ukombozi wa Baadhi ya Nchi za Afrika mwishoni mwa miaka ya 80.

Makamu wa Pili wa Rais wa Zanzibar ambaye ni mwanadiplomasia mkongwe amesema Tanzania ililazimika kupunguza baadhi ya Ofisi zake za Kibalozi Nje ya nchi kwenye miaka ya 80 kutokana na kuwa na uchumi Duni.

“ Ulikuwa ni uamuzi mgumu wa kufunga Baadhi ya Ofisi zetu Nje ya Nchi lakini tulilazimika kufanya hivyo kwa vile ilikuwa kuendesha Ofisi hizo ni gharama na inahitajika uwezo zaidi ”. Alisisitiza Balozi Seif.

Alisisitiza haja ya watedaji wa Ofisi za Kibalozi za Tanzania kujikita zaidi katika Taaluma ya kufanya kazi zaidi ya moja kwa lengo la kubana matumizi yasiyo ya lazima.

Akijibu suala la Mchakato wa Katiba mpya ya Tanzania Balozi Seif alitahadharisha kwamba ni vyema jambo hili wakaachiliwa wananchi wenyewe kuamua bila ya kuingiliwa na Vyama vya Siasa au wimbi la Taasisi na Mataifa ya nje ya Nchi.

“ Wapo baadhi ya watu wana wasi wasi kwamba upo mkono wa nje unaotumiwa kuwachanganya wananchi katika suala hili ya Katiba ingawa mimi sina ushahidi wa hilo ”. Alisema Balozi Seif.Hata hivyo aliwaomba wana Diplomasia wa Kigeni kuendelea kuheshimu Sheria za Nchi kwa vile taratibu za kuwepo kwao haziruhusu kuingilia mambo ya ndani ya Nchi.

Balozi Seif alikumbusha kwamba kazi ya Balozi ni kuimarisha uhusiano mwema kati ya nchi yake na mahali anapopawakilisha.

Hadi sasa Jamuhuri ya Muungano wa Tanzania ina Ofisi za Kibalozi Nje ya Nchi zipatazo 32 kutoka 25.

Othman Khamis Ame

Ofisi ya Makamu wa Pili wa Rais wa Zanzibar